အက်တမ်မြန်မာ ကျင့်ဝတ်စည်းကမ်း

“ကျွန်ုပ်တို့သည် မျှတစွာယှဉ်ပြိုင်ပါသည်။”

ကျွန်ုပ်တို့သည် ကျွန်ုပ်တို့၏ဖောက်သည်များ၊ လုပ်ငန်းလုပ်ဖက်များနှင့် လုပ်ငန်းနယ်ပယ်ကို အကျိုးရှိစေမည့် တရားမျှ တသော ပြိုင်ဆိုင်မှုရှိသောစျေးကွက်ကို ဖော်ထုတ်ရန် ကတိကဝတ်ပြုပါသည်။

ကျွန်ုပ်တို့သည် ကျွန်ုပ်တို့၏အမြင့်ဆုံးကျင့်ဝတ်စံနှုန်းများ၊တည်ဆဲဥပဒေများနှင့် စည်းမျဉ်းစည်းကမ်း များအားလုံးကို လိုက်နာလျက် အားမာန်ပြည့်ဝတက်ကြွစွာနှင့်တရားမျှတစွာ ယှဉ်ပြိုင်ခြင်းကို ယုံကြည်ပါသည်။
ကျွန်ုပ်တို့သည် ပြိုင်ဆိုင်မှုကို ဆန့်ကျင်သည့် မည်သည့် ပြုမူဆောင်ရွက်လုပ်ကိုင်မှုများကိုမဆို တင်းတင်းကျပ်ကျပ် တားမြစ်ထားသည်။ ထိုသို့တင်းကျပ်ရာတွင် အောက်ပါတို့ပါဝင်သည်၊ သို့ရာတွင် ဤမျှသာဟု ကန့်သတ်ထားခြင်းမရှိပါ။

• စုစည်း/ပူးပေါင်းဆောင်ရွက်မှု -စျေးနှုန်းများသတ်မှတ်ခြင်း၊ အကြံအဖန်လုပ်ထားသော လေလံများ၊ သို့မဟုတ် စျေးကွက်များ သို့မဟုတ် ဖောက်သည်များ စသည်တို့ကို ခွဲဝေပေးရန် ပြိုင်ဘက်များနှင့် သဘောတူညီချက်များရယူရာတွင် ပါဝင်ခြင်း။
• လက်ဝါးကြီးအုပ်သည့်အပြုအမူ -ယှဉ်ပြိုင်မှုကို ကန့်သတ်ရန် သို့မဟုတ် ဝင်ရောက်ရန် အတားအဆီးများ ဖန်တီးရန် တမင်လွှမ်းမိုးထားသော၊ စျေးကွက်အနေအထားကို အလွဲသုံးစားလုပ်ခြင်း။
• အတွဲလိုက် ချည်နှောင်ခြင်းနှင့် ပေါင်းစည်းခြင်း -လိုချင်သောဝန်ဆောင်မှုများရရှိရန် အခြေအနေတစ်ရပ်အနေဖြင့် သုံးစွဲသူ များအား မလိုလားအပ်သော ဝန်ဆောင်မှုများကို ဝယ်ယူခိုင်းစေခြင်း။
• သီးသန့်သဘောတူညီချက်များ -ကျွန်ုပ်တို့၏လုပ်ဖော်ကိုင်ဖက်များ သို့မဟုတ် ဖောက်သည်များအနေဖြင့် ကျွန်ုပ်တို့၏ ပြိုင်ဘက်များ နှင့်စီးပွားရေးလုပ်ကိုင်ဆောင်ရွက်နိုင်စွမ်းကို ကန့်သတ်ထည့်သွင်းလျှက် စာချုပ်ပြုလုပ်ချုပ်ဆိုခြင်း။
• သတင်းအချက်အလက်ဖလှယ်ခြင်း -ပြိုင်ဘက်များနှင့် စီးပွားရေးအရ အရေးကြီးသော/အရေးပါသော သတင်းအချက် အလက်များ မျှဝေခြင်းကို ကန့်သတ်ခြင်းတို့ဖြစ်သည်။

သို့ရာတွင် ဤမျှသာဟုဆိုလိုခြင်းမရှိဘဲ ကျွန်ုပ်တို့သည် ကုန်သွယ်မှုအသင်းအဖွဲ့များ သို့မဟုတ် ဆက်သွယ်ရေးလုပ်ငန်းဆိုင်ရာဖိုရမ်များတွင်ပါဝင်ခြင်းမပြုမီ ဥပဒေရေးရာဌာန အကြီးအကဲ ထံမှ စာဖြင့်ရေးသားထားသောခွင့်ပြုချက်(စာဖြင့်) ရယူဆောင်ရွက်ပါသည်။

လက်ရှိ သို့မဟုတ် အလားအလာရှိသော လုပ်ငန်းပြိုင်ဖက်တစ်ဦးနှင့် စကားပြောဆိုမှုတိုင်းသည် မသင့်လျော်သော သို့မဟုတ် ပြိုင်ဆိုင်မှုကိုဆန့်ကျင်သော အနေအထားတစ်ခုသို့ကူးပြောင်းပါက၊ ကျွန်ုပ်တို့သည် အဆိုပါဆွေးနွေးမှုမှ ချက်ခြင်း နှုတ်ထွက်ပြီး အဖြစ်အပျက်အား ကျွန်ုပ်တို့၏ဥပဒေရေးရာဌာနနှင့်/သို့မဟုတ် Integrity Hotline သို့ သတင်းပို့ပါသည်။

ကျွန်ုပ်တို့သည် ယှဉ်ပြိုင်မှုဥပဒေကို ချိုးဖောက်သည်ဟုသံသယရှိသည့် မည်သည့်ချိုးဖောက်မှုမျိုးကိုမဆို နှောင့်နှေးမှုမရှိစေဘဲ ဥပဒေရေးရာဌာနသို့ သတင်းပို့ရန်အရေးကြီးပါသည်၊ ထို့နောက် ယင်းကို လိုအပ်ပါက လိုအပ်သကဲ့သို့ သက်ဆိုင်ရာအာဏာပိုင်များထံ ဆက်လက် တိုင်ကြားရန် တာဝန်ရှိပါသည်။

“ကျွန်ုပ်တို့သည် ဘဏ္ဍာရေးဆိုင်ရာမှတ်တမ်းများ ကို တိတိကျကျ ထိန်းသိမ်းထားရှိ၍ စာရင်းထုတ်ပြန်ခြင်းဆိုင်ရာစံနှုန်းအားလုံးကို ကိုက်ညီစွာလိုက်နာပါသည်။”

ကျွန်ုပ်တို့သည် ကျွန်ုပ်တို့၏ အစုရှယ်ယာရှင်များ၊ ဖောက်သည်များ၊ စီးပွားရေးလုပ်ဖော်ကိုင်ဖက်များနှင့် ဝန်ထမ်းများ၏ ယုံကြည်မှုကို ဆက်လက်ထိန်းသိမ်းထားရန် ဘဏ္ဍာရေးဆိုင်ရာ သမာသမတ်ကျမှုနှင့် ပွင့်လင်းမြင်သာမှုစံနှုန်းများကို အမြင့်ဆုံးထားရှိ လိုက်နာစောင့်ထိန်းကျင့်သုံးရန် ကျွန်ုပ်တို့ သန္နိဌာန်ချထားပါသည်။

ကျွန်ုပ်တို့၏ အကျိုးသက်ဆိုင်နေသူများ၏ ယုံကြည်မှု နှင့် လုပ်ငန်းရေရှည်တည်တံ့ဖြစ်ထွန်းနိုင်ရေးအတွက် ဤစံချိန်စံနှုန်းများနှင့် ကျင့်ဝတ်များကို ATOM ၏ ဝန်ထမ်းများ၊ ကန်ထရိုက်တာများ နှင့်မိတ်ဖက်လက်တွဲဖော် အားလုံးက လိုက်နာကျင့်သုံးရန် မျှော်လင့်ပါသည်။

ကျွန်ုပ်တို့သည် တည်ဆဲဘဏ္ဍာရေးဥပဒေများ၊ စည်းမျဉ်းများနှင့် ကုမ္ပဏီမူဝါဒများအားလုံးကို တင်းကြပ်စွာ လိုက်နာ ပါသည်။ ၎င်းတို့တွင် ကျွန်ုပ်တို့၏လုပ်ငန်းနှင့်သက်ဆိုင်သော စာရင်းကိုင်စံနှုန်းများနှင့် အလေ့အကျင့်များကို လိုက်နာခြင်း ပါဝင်သည်။

ကျွန်ုပ်တို့သည် ကုမ္ပဏီ၏ပိုင်ဆိုင်မှုများကိုကာကွယ်ရန်နှင့် ဘဏ္ဍာရေးအစီရင်ခံခြင်းများကို သေချာတိကျစေရန် ကုမ္ပဏီ၏ သင်းဖွဲ့စီမံထိန်းချုပ်ခြင်းဆိုင်ရာ လုပ်ထုံးလုပ်နည်း (Internal Control Procedures) အားလုံးကိုလိုက်နာပါသည်။ ၎င်းတွင် အခွင့်အာဏာလွှဲအပ်ခြင်းဆိုင်ရာ လုပ်ထုံးလုပ်နည်း/လုပ်ပိုင်ခွင့်အပ်နှင်းခြင်းဆိုင်ရာ လုပ်ထုံးလုပ်နည်းများနှင့်အညီ လိုက်နာဆောင်ရွက်မှုရှိစေရေးနှင့် သတ်မှတ်စည်းကမ်း ချက်များနှင့်အညီ လိုက်နာဆောင်ရွက်မှုရှိစေရေးနှင့် ငွေကြေးလွှဲပြောင်းမှုအားလုံးအတွက် အထောက်အထားပြုမှတ်တမ်းတင်ခြင်းကို စနစ်တကျပြုလုပ်မှုရှိစေရေးကို သေချာစေ ခြင်းတို့ ပါဝင်သည်။

ကျွန်ုပ်တို့သည် မှတ်တမ်းမှတ်ရာအတုများဖန်တီးခြင်း၊ စာရွက်စာတမ်းအတုပြုလုပ်ခြင်း၊ မှတ်တမ်းများကိုဖျက်ဆီးခြင်း၊ ငွေကြေးခဝါချမှုလုပ်ငန်းများတွင်ပါဝင်ခြင်း သို့မဟုတ် စာရင်းအင်းများ၊ အရောင်း အဝယ်မှတ်တမ်းများ သို့မဟုတ် ငွေကြေးဆိုင်ရာအချက်အလက်များကို လွဲမှားဖော်ပြသည့် မည်သည့်လုပ်ဆောင်ချက်များတွင်မဆို ပါဝင်ခြင်း မှ ရှောင်ကြဉ်ပါသည်။

ကျွန်ုပ်တို့သည် ဆုံးဖြတ်ချက်များကို အာဏာခွဲဝေအသုံးပြုမှုဇယား (Authorization Matrix) နှင့် ချမှတ်အကောင်အထည်ဖော်ထားသော တာဝန်ပိုင်းခြားခွဲဝေသတ်မှတ်ချက်အညီသာပြုလုပ်၍ စနစ်တကျ ကြီးကြပ်ကွပ်ကဲထိန်းချုပ်မှုရှိစေရေးကို သေချာစေပါသည်။

ကျွန်ုပ်တို့သည် ကျွန်ုပ်တို့တွေ့ရှိထားသည့် လိမ်လည်မှု၊ သံသယဖြစ်ဖွယ် အရောင်းအ၀ယ်များ၊ ငွေကြေး သို့မဟုတ် စာရင်းအင်းဆိုင်ရာ မမှန်မကန်မှုများ၊ ငွေကြေးဆိုင်ရာ အချက်အလက်များကို မှားယွင်းစွာ အစီရင်ခံခြင်း သို့မဟုတ် ကုမ္ပဏီအရင်းအမြစ်များကို အလွဲသုံးစားလုပ်မှုတို့ကို Integrity Hotline သို့ ချက်ချင်းသတင်းပို့ပါသည်။

ကျွန်ုပ်တို့သည် ငွေကြေးခဝါချမှုကို ရှောင်ကြဉ်၍ မြန်မာနိုင်ငံတွင် မည်သည့်ငွေကြေးခဝါချမှု တိုက်ဖျက်ရေးဥပဒေများကိုမဆို ချိုးဖောက်ခြင်းမှလည်း ရှောင်ကြဉ်ပါသည်။ ၎င်းတို့တွင်-

• ငွေကြေး သို့မဟုတ် ပစ္စည်းဥစ္စာ၏ တရားမဝင်ဇာစ်မြစ်ကို ဖုံးကွယ်ရန် သို့မဟုတ် အသွင်ဖမ်းကွယ်ဝှက်နိုင်ရန်ရည်ရွယ်ချက်ဖြင့် ထိုငွေကြေးနှင့်ပစ္စည်းဥစ္စာတို့သည် ရာဇဝတ်မှုမှရရှိသော ငွေကြေးနှင့်ပစ္စည်းဥစ္စာမှန်း သိလျက်နှင့်ဖြစ်စေ၊ သိရန်အကြောင်းရှိလျက်နှင့်ဖြစ်စေ ငွေကြေးနှင့် ပစ္စည်းဥစ္စာတို့ကို ပြောင်းလဲခြင်း သို့မဟုတ် လွှဲပြောင်းခြင်း။
• စစ်မှန်သောသဘောသဘာဝ၊ အရင်းအမြစ်၊ တည်နေရာနှင့် သဘောထား၊ လှုပ်ရှားမှု သို့မဟုတ် ပိုင်ဆိုင်ခွင့် သို့မဟုတ် ပိုင်ဆိုင်မှုနှင့်စပ်လျဉ်း၍ ထိုငွေနှင့် ပစ္စည်းဥစ္စာများသည် ရာဇ၀တ်မှုမှဖြစ်နေကြောင်း သိလျှက်နှင့်ဖြစ်စေ၊ သိရှိရန်အကြောင်းရှိလျှက်နှင့်ဖြစ်စေ ဖုံးကွယ်ခြင်း သို့မဟုတ် အသွင်ဖမ်းကွယ်ဝှက်ထားခြင်း။
• ငွေကြေးနှင့် ပစ္စည်းဥစ္စာများကို လက်ခံရရှိသည့်အချိန်တွင် ထိုငွေကြေးနှင့် ပစ္စည်းဥစ္စာတို့သည် ရာဇ၀တ်မှုမှရရှိသော ငွေကြေးနှင့်ပစ္စည်းဥစ္စာမှန်း သိလျှက်နှင့်ဖြစ်စေ၊ သိရန်အကြောင်းရှိလျှက်နှင့်ဖြစ်စေ ရယူခြင်း၊ လက်ဝယ်ထားရှိခြင်း သို့မဟုတ် သုံးစွဲခြင်း။
• အထက်တွင်ဖော်ပြထားသည့် ပြစ်မှုတစ်ခုခုကိုကျူးလွန်ရန် ပူးပေါင်းဆောင်ရွက်ခြင်း၊ ပူးပေါင်းခဲ့ခြင်း၊ အားပေးအားမြှောက်ပြုခြင်း၊ အားပေးကူညီပေးခြင်း၊ ကူညီဆောင်ရွက်ပေးခြင်း၊ စီမံခန့်ခွဲခြင်း၊ အကြံဉာဏ် ပေးခြင်းနှင့် ပူးပေါင်းကြံစည် ခြင်း သို့မဟုတ် ဖွဲ့စည်းထားသောအဖွဲ့၏ အဖွဲ့ဝင်ဖြစ်နေခြင်း။

“ကျွန်ုပ်တို့သည်တာဝန်သိ၍တာဝန်ခံယူမှုရှိသည့်မိတ်ဖက်လုပ်ငန်း(Partners)များနှင့်လက်တွဲလုပ်ကိုင်ရန်မျှော်လင့်ထားပါသည်။”

ကျွန်ုပ်တို့၏အောင်မြင်မှုများသည် ကျွန်ုပ်တို့၏စီးပွားရေးလုပ်ဖော်ကိုင်ဖက်များ၏အောင်မြင်မှု၊ သမာသမတ်ရှိမှုနှင့် လွန်စွာ ဆက်စပ်နေကြောင်း ကျွန်ုပ်တို့အသိအမှတ်ပြုပါသည်။

ကျွန်ုပ်တို့သည် ကျွန်ုပ်တို့၏ယုံကြည်မှု၊ ပွင့်လင်းမြင်သာမှုနှင့် ထပ်တူကျမျှဝေတန်ဖိုးများပေါ်တွင် အခြေခံထားသော အပြန်အလှန် အကျိုးရှိသောဆက်ဆံရေးများကို မွေးမြူရန် ရည်စူးပါသည်။ ကျွန်ုပ်တို့၏ စီးပွားရေး လုပ်ဖော်ကိုင်ဖက်များတွင် ကျွန်ုပ်တို့၏ ဖောက်သည်များ နှင့် အသိုင်းအဝိုင်းများအတွက် အပြုသဘောဆောင်သောပြောင်းလဲမှုကို တွန်းအားပေး၍၊ ဆန်းသစ်တီထွင်မှုကို မြှင့်တင်၍၊ တန်ဖိုးများဖန်တီး၍ ကျွန်ုပ်တို့၏လုပ်ငန်းဆောင်တာများနှင့် ဝန်ဆောင်မှုများကို ပံ့ပိုးပေးသည့် ထောက်ပံ့သူများ၊ ရောင်းချသူများ၊ ကန်ထရိုက်တာများ၊ အတိုင်ပင်ခံများနှင့် အခြားတစ်ပါးသောသူများ ပါဝင်သည်။ ကျွန်ုပ်တို့၏ စီးပွားရေးလုပ်ဖော်ကိုင်ဖက်များ၏ လုပ်ဆောင်ချက်များသည် ကျွန်ုပ်တို့၏ဂုဏ်သိက္ခာကို ထိခိုက်စေနိုင်ပြီး ကျွန်ုပ်တို့အား တရားဥပဒေဆိုင်ရာ အန္တရာယ်များရှိစေနိုင်ကြောင်းကိုလည်း သတိပြုရန်အရေးကြီးပါသည်။

ကျွန်ုပ်တို့မြင့်မားစွာချမှတ်ကျင့်သုံးလျှက်ရှိသည့် ကျင့်ဝတ်သိက္ခာဆိုင်ရာ စံချိန်စံနှုန်းများကို ကျွန်ုပ်တို့၏ မိတ်ဖက်လုပ်ငန်းများကလည်း ကျွန်ုပ်တို့နည်းတူလိုက်နာကျင့်သုံးကြရန် မျှော်လင့်ပါသည်။

ကျွန်ုပ်တို့သည် ကျွန်ုပ်တို့၏ မိတ်ဖက်လုပ်ငန်းများ/စီးပွားရေးလုပ်‌ဖော်ကိုင်ဖက်များကို ရွေးချယ်ရာတွင် လုပ်ငန်းများကို ကျင့်ဝတ်သိက္ခာနှင့်တာဝန်ခံယူမှုရှိသော လုပ်ထုံးလုပ်နည်းများ၊ အလေ့အကျင့်များနှင့်လုပ်ကိုင်လည်ပတ်ဆောင်ရွက်ရန် တန်ဖိုးနှင့်ခံယူမှုသိန္နိဌာန်အားဖြင့် ကျွန်ုပ်တို့နှင့်ထပ်တူကျသော စီးပွားရေးလုပ်ဖော်ကိုင်ဖက်များကို ရွေးချယ်မှုရှိစေရေး သေချာမှုရှိစေရန်အလို့ငှာ နောက်ကြောင်းစစ်ခြင်း(due diligence) ကို စေ့စေ့စပ်စပ်ဆောင်ရွက်ပါသည်။

နိုင်ငံတကာ ပိတ်ဆို့အရေးယူမှုစနစ်များနှင့် သွင်းကုန်-ပို့ကုန် သတ်မှတ်ချက်များ အပါအဝင် သက်ဆိုင်သည့် ကုန်သွယ်မှု ဆိုင်ရာကန့်သတ် ချက်များကို ကျွန်ုပ်တို့လိုက်နာပါသည်။

လုပ်ငန်းလုပ်ဖော်ကိုင်ဖက်များအားလုံးသည် သက်ဆိုင်ရာဒေသန္တရ၊ ပြည်တွင်းနှင့် ပြည်ပနိုင်ငံများရှိဥပဒေများနှင့် စည်းမျဉ်း စည်းကမ်းများအားလုံးကို မဖြစ်မနေလိုက်နာရမည်ဖြစ်သည်။ ၎င်းတွင် ငွေကြေးခဝါချမှု တိုက်ဖျက်ရေးဥပဒေ၊ အလုပ် သမားဥပဒေ၊ သဘာဝပတ်ဝန်းကျင် ထိန်းသိမ်းရေးဥပဒေနှင့် အဂတိလိုက်စားမှု တိုက်ဖျက်ရေးဥပဒေတို့ ပါဝင်သည်၊ သို့ရာတွင် ဤမျှသာဟုကန့်သတ်ထားခြင်းမရှိပါ။

ကျွန်ုပ်တို့၏စီးပွားရေးလုပ်ဖော်ကိုင်ဖက်များသည် ငွေကြေးခဝါချမှု နှင့် အကြမ်းဖက်မှုကို ငွေကြေးထောက်ပံ့မှု တိုက်ဖျက်ရေး (AML/CFT) ဆိုင်ရာ နည်းဥပဒေစည်းမျဉ်းစည်းကမ်းများအားလုံးကို လိုက်နာရန် နှင့် ကျွန်ုပ်တို့၏စီးပွားရေးလုပ်ဖော်ကိုင်ဖက်များ၏ လုပ်ငန်းဆောင်ရွက်မှုများသည် ငွေကြေးခဝါချမှု သို့မဟုတ် ဘဏ္ဍာရေးဆိုင်ရာ ရာဇဝတ်မှု တို့ကို လွယ်ကူချောမွေ့စေခြင်း သို့မဟုတ် ပံ့ပိုးပေးခြင်းမရှိကြောင်း သေချာမှုရှိစေရန်လည်း ရှင်းလင်းပြတ်သားစွာမျှော်လင့်ထားပါသည်။

ကျွန်ုပ်တို့၏ စီးပွားဖက်များသည် လူ့အခွင့်အရေးကို လက်ကိုင်ထားပြီး မျှတသောလုပ်ခလစာနှင့် ဘေးကင်းလုံခြုံသော လုပ်ငန်းခွင်ရရှိရေးကို ဆောင်ရွက်ပေးရမည်ဖြစ်ပြီး သဘာဝပတ်ဝန်းကျင် ထိခိုက်မှုအနည်းဆုံးဖြစ်အောင်၊ စွန့်ပစ်ပစ္စည်း လျှော့ချခြင်း နှင့် ရာသီဥတုပြောင်းလဲမှုဆိုင်ရာ ကြိုးပမ်းဆောင်ရွက်မှုများကို ၊ အားပေးထောက်ခံပံ့ပိုးပေးခြင်းဖြင့် ရေရှည်တည်တံ့ခိုင်မြဲပြီး တာဝန်ခံယူမှုအပြည့်အဝရှိသော ပုံစံဖြင့်လုပ်ကိုင်ဆောင်ရွက်ရန် တိုက်တွန်းအားပေးပါသည်။

ကျွန်ုပ်တို့သည် ကျွန်ုပ်တို့၏စီးပွားရေးလုပ်ဖော်ကိုင်ဖက်များနှင့် အရောင်းအ၀ယ်ပြုလုပ်မှုများအပေါ် နောက်ကြောင်းစစ်ဆေးဆောင်ရွက်ခြင်း (due diligence) ၊ သံသယဖြစ်ဖွယ်လုပ်ဆောင်မှုများကို သတင်းပို့ခြင်းနှင့် တိကျသောမှတ်တမ်းများကို ထိန်းသိမ်းခြင်းဖြင့် ငွေကြေးခဝါချမှုနှင့် ရာဇ၀တ်မှုများကို ငွေကြေးထောက်ပံ့ခြင်းဆိုင်ရာ ကိစ္စရပ်များကို တားဆီးဖော်ထုတ်ရန် သန္နိဌာန်ချထား ပါသည်။

ကျွန်ုပ်တို့သည်မိတ်ဖက်လုပ်ငန်းများအားလုံးကို မျှတ၍ပွင့်လင်းမြင်သာမှုရှိသည့်ပုံစံဖြင့် လေးစားစွာ ဆက်ဆံပါသည်။

“ကုမ္ပဏီပြင်ပနှင့် ဆက်သွယ်ဆောင်ရွက်မှုများတွင် တာဝန်ခံယူမှုရှိစွာ ကျွန်ုပ်တို့ အမြဲဆောင်ရွက်ပါသည်။”

ကျွန်ုပ်တို့သည် ကျွန်ုပ်တို့၏ပုဂ္ဂိုလ်ရေး/ကိုယ်ပိုင်အတွေးအမြင်များကို ဖလှယ်ရန်အတွက်သာ လူမှုမီဒီယာကို ဆင်ခြင်တုံတရားရှိရှိအသုံးပြုပြီး ကုမ္ပဏီက အတိအလင်းခွင့်ပြုထားမှသာ ကျွန်ုပ်တို့က ကုမ္ပဏီကိုကိုယ်စားပြုကြောင်း သေချာစေပါသည်။

ဝန်ထမ်းများအား ၎င်းတို့၏ ဆိုရှယ်မီဒီယာအကောင့်(များ)တွင် ATOM နှင့်ပတ်သက်သည့် လျှို့ဝှက်မဟုတ်သော သတင်းများ/လျှို့ဝှက်ထားရန်မလိုအပ်သော၊ အောင်မြင်မှုမှတ်တိုင်များနှင့် အောင်မြင်မှုများကို မျှဝေရန် တိုက်တွန်း အားပေးပါသည်။

ခွင့်ပြုချက်ရရှိထားသော ပြောရေးဆိုခွင့်ရှိသူသာ ကုမ္ပဏီကိုယ်စား ပြောဆိုဆက်သွယ်ခွင့်ရှိသည်။ ပြောရေးဆိုခွင့်ရှိသူများ၏ အများပြည်သူသို့ထုတ်ပြန်ချက်အားလုံးသည် ကျွန်ုပ်တို့ကုမ္ပဏီ၏မူဝါဒများ၊ တန်ဖိုးများနှင့် ကိုက်ညီကြောင်း သေချာ စေရန် ၎င်းတို့တွင် တာဝန်ရှိပါသည်။

မီဒီယာဆိုင်ရာ စုံစမ်းမေးမြန်းမှုအားလုံးကို Corporate Communication ဌာသို့ လမ်းညွှန်ပေးပို့ရပါမည်။

ပြင်ပဆက်သွယ်မှုအားလုံးသည် တည်ဆဲဥပဒေများ၊ စည်းမျဉ်းစည်းကမ်းများနှင့် ဆက်သွယ်ရေး.လုပ်ငန်းဆိုင်ရာစံနှုန်းများကို လိုက်နာလျက် ပြုလုပ်ဆောင်ရွက်ရမည်။

ဝန်ထမ်းအားလုံးသည် Corporate Communication Policy နှင့် ဆိုရှယ်မီဒီယာလမ်းညွှန်ချက်များကို လိုက်နာကြရမည်ဖြစ်ပြီး မည်သို့သော ဆက်သွယ်ပြောဆိုဆောင်ရွက်မှုများနှင့်စပ်လျဉ်း၍မဆို ယင်းတို့၏ သင့်တော်ဆီလျော်မှုအပေါ်တွင် မသေချာမရေရာဖြစ်နေပါက လမ်းညွှန်မှုရယူပါ။

စပွန်စာရှစ်ပေးရန်နှင့်လှူဒါန်းမှုပြုပေးရန်အတွက် အခြားတစ်ပါးသူများ၊ ပြင်ပအဖွဲ့အစည်းတို့က ချဉ်းကပ်မှုပြုသည့်အခါ Corporate Communication ဌာနသို့ အကြောင်းကြားရန် ဝန်ထမ်းအားလုံးကို အကြံပြုပါသည်။

အလုပ်တာဝန်ရာထူးကြောင့်သိရှိလာသည့် အရေးကြီးသော သို့မဟုတ် လျှို့ဝှက်အပ်သော သတင်းအချက်အလက်တို့ကို အများပြည်သူဆိုင်ရာနေရာများတွင်လည်းကောင်း၊ လူမှုကွန်ရက်မီဒီယာတွင်လည်းကောင်း ကျွန်ုပ်တို့ ဆွေးနွေးခြင်းမပြုပါ။

ကျွန်ုပ်တို့သည် ATOM ၏ မူဝါဒများနှင့် လုပ်ထုံးလုပ်နည်းများကို လိုက်နာပြီး ပြည်သူ့ဝန်ထမ်းများအား မှန်ကန်တိကျသော သတင်းအချက်အလက်များကို အမြဲပေးပါသည်။

စီးပွားရေးဆိုင်ရာ သို့မဟုတ် ခွင့်ပြုချက်အတွက် ATOM ပါဝင်ဆောင်ရွက်လျက်ရှိစဉ် လုပ်ငန်းဆိုင်ရာ လောကဝတ်ပြုခြင်းများအပါအဝင် ပြည့်သူ့ဝန်ထမ်းများနှင့်စပ်လျဉ်း၍ ကျင့်သုံးရမည့်သက်ဆိုင်အကျုံးဝင်သော ဥပဒေများ သို့မဟုတ် နည်းဥပဒေစည်းမျဉ်းစည်းကမ်းများနှင့်ကိုက်ညီအောင် ကျွန်ုပ်တို့အမြဲလိုက်နာ ဆောင်ရွက်ပါသည်။

ATOM သည် နိုင်ငံရေး ရာထူးများ သို့မဟုတ် နိုင်ငံရေးလှုပ်ရှားမှုများနှင့်ပါဝင်ပတ်သက်မှုများမရှိသည့်အပြင် နိုင်ငံရေးပါတီများအား တိုက်ရိုက်ငွေကြေးထောက်ပံ့သည့်ပုံစံဖြင့်သော်လည်းကောင်း၊ နိုင်ငံရေးပါတီကိစ္စရပ်များကို ထမ်းရွက်နိုင်ရန်အတွက် လုပ်ခလစာပေး၍ခန့်အပ်ထားသော ဝန်ထမ်းများ၏လုပ်အားကိုပေးအပ်ကာ ထောက်ပံ့သည့်ပုံစံ (paid time) ဖြင့်သော်လည်းကောင်း မည်သည့်ပုံစံဖြင့်မဆို မထောက်ပံ့ပါ။

ကျွန်ုပ်တို့သည် နိုင်ငံသားတစ်ဦးအနေဖြင့် ဥပဒေနှင့်ညီညွတ်သည်ဆိုပါက နိုင်ငံရေးလှုပ်ရှားမှုများတွင် မိမိသဘောအလျောက် ပါဝင်နိုင်သည်၊ သို့ရာတွင် ထိုသို့လှုပ်ရှားဆောင်ရွက်မှုများအတွက် ကျွန်ုပ်တို့အနေဖြင့် ကုမ္ပဏီ၏ ရံပုံငွေ နှင့်/သို့မဟုတ် ကုမ္ပဏီ၏အရင်းအမြစ်များ သို့မဟုတ် နိုင်ငံရေးပါတီကိစ္စရပ်များကို ထမ်းရွက်နိုင်ရန်အတွက် လုပ်ခလစာပေး၍ ခန့်အပ်ထားသောဝန်ထမ်းများ၏ လုပ်အားကိုပေးအပ်ကာထောက်ပံ့သည့်ပုံစံ(paid time) ကိုသော်လည်းကောင်း သုံးစွဲခြင်းမပြုပါ။

“ကျွန်ုပ်တို့သည် လုပ်ငန်းဆိုင်ရာ ဆုံးဖြတ်ချက်များအပေါ်တွင် သက်ရောက်မှုရှိသည်ဟု ထင်မြင်ယူဆနိုင်ဖွယ်ရာ ရှိသည့် လုပ်ငန်းဆိုင်ရာ လောကဝတ်ပြုမှုများကို ရှောင်ရှားပါသည်။”

စီးပွားရေးအရပေးသော လက်ဆောင်ပဏ္ဏာများနှင့် အတိုင်းအတာအားဖြင့် သင့်တင့်မျှတသောဖျော်ဖြေရေးများကို မိတ်ဖက်များကြားတွင် ချစ်ကြည် ရင်းနှီးမှု တည်ဆောက်ရန်နှင့် လုပ်ငန်းခွင်အတွင်းဆက်ဆံရေးခိုင်မာစေရန်အတွက် အများအားဖြင့် အသုံးပြုကြသည်။ အချို့သောအခြေအနေများတွင်၊ ရံဖန်ရံခါ အစားအစာများ ကျွေးမွေးခြင်း၊ ကုမ္ပဏီ၏အသေးစား ပရိုမိုးရှင်းပစ္စည်းများ၊ တိုကင်များ ပံ့ပိုးပေးခြင်း သို့မဟုတ် လက်ခံခြင်း သို့မဟုတ် အားကစားနှင့် ယဉ်ကျေးမှုပွဲများတွင် ပါဝင်ခြင်းသည်သင့်လျော်ပါသည်။

သို့ရာတွင် လက်ဆောင်ပဏ္ဏာများ၊ ဧည့်ဝတ်ပြုမှု၊ လူမှုရေးပွဲများ၊ ဆွေးနွေးပွဲများ၊ ဖျော်ဖြေရေး၊ အစားအစာများနှင့် အဖျော်ယမကာများကိုလည်းလာဘ်ပေးလာဘ်ယူမှုအတွက်တလွဲအသုံးချခံရနိုင်ချေရှိကြောင်းအသိအမှတ်ပြုရန် အရေး ကြီးပါသည်။ ၎င်းတို့သည် တိုက်ရိုက်လာဘ်ပေးလာဘ်ယူမှုအဖြစ်သော်လည်းကောင်း၊ လူတစ်ဦးတစ်ယောက်ကို သွေးဆောင်ဖြားယောင်းဆွဲဆောင်ခြင်းအားဖြင့်လာဘ်ပေးလာဘ်ယူမှုအတွက် အခွင့်အလမ်းများဖန်တီး၍သော်လည်းကောင်း အသုံးချနိုင်သည်။ ထို့အပြင် ၎င်းတို့သည် လာဘ်ပေးလာဘ်ယူမှုအစီအမံတစ်ခုအတွင်း အချင်းချင်းဆက်ဆံရေးကို တည်ဆောက်ရာတွင် သို့မဟုတ်ထိန်းသိမ်းရာတွင် အားပေးအားမြှောက်အထောက်အကူဖြစ်စေနိုင်သည်။

လုပ်ငန်းဆုံးဖြတ်ချက်တစ်ရပ်ကို မလျော်ကန်စွာ လွှမ်းမိုးနိုင်သည့် သို့မဟုတ် ထင်မြင်ယူဆနိုင်သည့် စီးပွားရေးဆိုင်ရာ လောကဝတ်ပြုမှုများကို ကမ်းလှမ်းခြင်း သို့မဟုတ် လက်ခံခြင်းကို ကျွန်ုပ်တို့ ပြတ်ပြတ်သားသား တားမြစ်ထားသည်။ ကျွန်ုပ်တို့သည် ငွေသား သို့မဟုတ် ငွေသားနှင့် အလားတူ၊ သို့မဟုတ် တန်ဖိုးကြီးသော လက်ဆောင်များကို မည်သည့် အခါမျှ ကမ်းလှမ်းခြင်း သို့မဟုတ် လက်ခံခြင်းမပြုပါ။

ကျွန်ုပ်တို့သည် လက်ဆောင်များကို တန်ဖိုးအားဖြင့်မပြောပလောက်သည့် ပရိုမိုးရှင်းပစ္စည်းများကိုသာ လက်ဆောင်အဖြစ် ပေးကမ်းလဲလှယ်ခြင်းကို ခွင့်ပြုပြီး၊ ဓလေ့ထုံးတမ်းအရလုပ်လေ့လုပ်ထလည်းရှိ၍ သင့်လျော်မှုရှိမှသာ ယင်းတို့ကိုလဲလှယ်ခွင့်ပြုပါသည်။

ကျွန်ုပ်တို့သည် အကြောင်းအရာအားဖြင့် ပွင့်လင်းမြင်သာမှုရှိသော၊ ကုန်ကျစရိတ်အားဖြင့်လည်းကျိုးကြောင်း ဆီလျော်မှုရှိမှုရှိသော၊ လုပ်ငန်းအတွက်ရည်ရွယ်ချက်အားဖြင့်လည်း ထင်ရှားပေါ်လွင်သော အခြေအနေအချိန်အခါ၌သာလျှင် ဧည့်ဝတ်ပြုမှုကို ကမ်းလှမ်းခြင်း သို့မဟုတ် လက်ခံခြင်းပြုနိုင်သည်။ သို့သော် ကျွန်ုပ်တို့သည် မိမိတို့၏ အသုံးစရိတ်ကို မိမိတို့ကိုယ်တိုင်ကျခံသုံးစွဲခြင်းမျိုးကို ပိုမိုလိုလားနှစ်သက်ပါသည်။

မည်သည့်အခြေအနေနှင့်အချိန်အခါ မျိုးတွင်မဆို မိသားစုဝင်များ သို့မဟုတ် ရင်းနှီးသောမိတ်ဆွေများကို လုပ်ငန်းဆိုင်ရာ လောကဝတ် များ ပြုလုပ်ကမ်လှမ်းပေးကမ်းခြင်းမပြုရပါ။

ကျွန်ုပ်တို့သည်လုပ်ငန်းဆိုင်ရာလောကဝတ်ပြုမှုများကို ကမ်းလှမ်းခြင်း သို့မဟုတ် လက်ခံခြင်းများနှင့်စပ်လျဉ်း၍ ကျွန်ုပ်တို့၏ သက်ဆိုင်ရာလိုင်းမန်နေဂျာ (Line Manager) နှင့်တိုင်ပင်ဆွေးနွေးရန် လိုအပ်ပါသည်။

ကျွန်ုပ်တို့သည် Chief Business Risk Officer ၏ ကြိုတင်စိစစ်သုံးသပ်ချက် နှင့်/သို့မဟုတ် အမှုဆောင်အရာရှိချုပ်ထံမှ စာဖြင့်ရေးသားထားသော ကြိုတင်ခွင့်ပြုချက်အပေါ်တွင်မူတည်၍ အထူးကိစ္စရပ်များနှင့် အထူးအခြေအနေအချိန်အခါများတွင်သာ ချွင်းချက်ပြုပေးရန် တောင်းခံ ဆောင်ရွက်နိုင်ပါသည်။

“ကျွန်ုပ်တို့သည်အကျိုးစီးပွားပဋိပက္ခကို ကျွန်ုပ်တို့ ရှောင်ကြဉ်ပါသည်။”

လူတစ်ဦးတစ်ယောက်သည် ၎င်းတို့၏ မိသားစု သို့မဟုတ် အပေါင်းအသင်းများ အပါအဝင်ပုဂ္ဂိုလ်ရေးဆိုင်ရာ အကျိုးအမြတ်အတွက် ATOM တွင်ရရှိထားသော ၎င်း၏ရာထူးကို အသုံးချခြင်းသည် ATOM ၏ အကျိုးစီးပွားများနှင့်ကွဲလွဲနိုင်ခြေရှိသည့်အခါ အကျိုးစီးပွားဆိုင်ရာပဋိပက္ခဖြစ်ပေါ်လာနိုင်ပါသည်။ အမှန်တကယ် ဖြစ်ပေါ်တည်ရှိနေ သော အကျိုးစီးပွားဆိုင်ရာ ပဋိပက္ခအပြင် အကျိုးစီးပွား ပဋိပက္ခဟုထင်မြင်ယူဆနိုင်ဖွယ်ရှိသည့်ကိစ္စရပ်များကိုလည်း မဖြစ်မနေရှောင်ရှားရမည်။

အကျိုးစီးပွားပဋိပက္ခတစ်ခုသည် ATOM တွင် ကျွန်ုပ်တို့၏ တာဝန်နှင့်ဝတ္တရားများကို ထမ်းဆောင်ရာတွင် မျှော်လင့်ထားသော ကျွန်ုပ်တို့၏ တန်ဖိုး၊ ကျွန်ုပ်တို့၏ ယဉ်ကျေးမှု နှင့် ကျွန်ုပ်တို့၏အပြုအမူတို့ကို ယုတ်လျော့ပျက်ယွင်းထိခိုက်စေနိုင်သည်။

အကျိုးစီးပွားပဋိပက္ခတစ်ခုသည် လူပုဂ္ဂိုလ်တစ်ဦး၏ တာဝန်များကို သမာသမတ်ကျကျ ထိထိရောက်ရောက် ထမ်းဆောင် နိုင်မှုစွမ်းရည်ကို အဟန့်အတားဖြစ်စေနိုင်သည်။

သိက္ခာမဲ့သော အပြုအမူများ မရှိလျှင်ပင် အကျိုးစီးပွား ပဋိပက္ခများ တည်ရှိနိုင်သည်။ လုပ်ငန်းဆိုင်ရာဆုံးဖြတ်ချက်ချသည့် လုပ်ငန်းစဉ်များတွင် မလျော်ကန်သော သြဇာလွှမ်းမိုးမှုရှိသည်ဟု ထင်မြင်ယူဆဖွယ်ရာရှိနေခြင်းကိုပင် ရှောင်ရှားရမည်။ သို့ဖြစ်ရာ ATOM ၏ ဒါရိုက်တာများ၊ အရာရှိများနှင့် ဝန်ထမ်းအားလုံးက ၎င်းတို့၏ လုပ်ကိုင်ဆောင်ရွက်မှုများ နှင့် ဆုံးဖြတ်ချက်များကို ကုမ္ပဏီ၏ အကျိုးစီးပွားအတွက်ရှေးရှု၍ ဓမ္မဓိဌာန်ကျကျ အကောင်းဆုံး လုပ်ကိုင်ဆောင်ရွက်ချမှတ်ပြုလုပ်ကြလိမ့်မည်ဟု ATOM က မျှော်လင့်ထားပါသည်။

ထို့ကြောင့် ကျွန်ုပ်တို့သည် အကျိုးစီးပွားဆိုင်ရာ ပဋိပက္ခများကို ရှောင်ရှားရမည်ဖြစ်ပြီး ATOM ၏ အကျိုးစီးပွား အတွက် အကောင်းဆုံးဆောင်ရွက်မည်ဟူသော ကျွန်ုပ်တို့၏ သန္နိဌာန်အပေါ်တွင် အကျိုးသက်ရောက်မှုရှိလာနိုင်သော ကျွန်ုပ်တို့၏ ပုဂ္ဂိုလ်ရေး သို့မဟုတ် ပြင်ပလုပ်ငန်း အကျိုးစီးပွား သြဇာလွှမ်းမိုးချယ်လှယ်သက်ရောက်ခြင်းမရှိစေရပါ။

မိမိ၏ ကိုယ်ကျိုးစီးပွားအတွက်သော်လည်းကောင်း၊ သက်ဆိုင်ဆက်စပ်ပတ်သက်နေသောပုဂ္ဂိုလ်များ၏ အကျိုးစီးပွားအတွက်သော်လည်းကောင်း ATOM တွင် ကျွန်ုပ်တို့၏ရာထူးများ၊ ATOM ၏လျှို့ဝှက် သတင်းအချက်အလက်များ၊ ပိုင်ဆိုင်မှုများ၊ သို့မဟုတ် အခြားမည့်သည့်အရင်းအမြစ်များကိုမဆို အသုံးချခြင်းမှ ကျွန်ုပ်တို့အား တင်းကြပ်စွာတားမြစ်ထားပါသည်။

ဝန်ထမ်းများ၊ ပေးသွင်းသူများ၊ လုပ်ငန်းပူးတွဲလုပ်ကိုင်သူများနှင့် ပြိုင်ဘက်များ၏ ဝန်ထမ်းများ အစရှိသောသူတို့နှင့် ဆက်ဆံရေး အပါအဝင် ATOM ဝန်ထမ်းများအဖြစ် ကျွန်ုပ်တို့၏ဆုံးဖြတ်ချက်များအပေါ် သက်ရောက်မှုရှိနိုင်သည့် မည်သည့် ဆက်ဆံရေးကိုမဆို ကျွန်ုပ်တို့ ထုတ်ဖော်ထားရန် လိုအပ်ပါသည်။

ကျွန်ုပ်တို့သည် ATOM ၏ အကျိုးစီးပွားအတွက် အကောင်းဆုံး လုပ်ဆောင်ရန် ကျွန်ုပ်တို့၏တာဝန်ကို ထိခိုက်နိုင်သော၊ သို့မဟုတ် ထိခိုက်နိုင် သည်ဟု ထင်မြင်နိုင်သော ပြင်ပတာဝန်များ သို့မဟုတ် ရာထူးများ/ ထိတွေ့ဆက်ဆံမှုများကို ရယူထားခြင်းမရှိပါ။

မည်သို့သောအကျိုးစီးပွားဆိုင်ရာ ပဋိပက္ခများကိုမဆို ကျွန်ုပ်တို့သိလျှင်သိချင်း သက်ဆိုင်ရာလိုင်းမန်နေဂျာ(Line Manager) နှင့် Ethics and Compliance ဌာနတို့ထံသို့ အစီရင်ခံရန်လိုအပ်ပါသည်။

ကျွန်ုပ်တို့သည် ပြင်ပ ဒါရိုက်တာရာထူးများ၊ တာဝန်များ သို့မဟုတ် အခြားအရေးပါသော တာဝန်ပေးအပ်မှုများကို လက်ခံခြင်းမပြုမီ ကျွန်ုပ်တို့၏ သက်ဆိုင်ရာလိုင်းမန်နေဂျာ (Line Manager)ထံမှ စာဖြင့်ရေးသားထားသော ခွင့်ပြုချက်ကို ရရှိထားရန် လိုအပ်ပြီး၊ ကျွန်ုပ်တို့သည် မှတ်တမ်းအထောက်အထားများကို ကုမ္ပဏီ၏ လုပ်ထုံးလုပ်နည်းများနှင့်အညီ ပြုလုပ်ထိန်းသိမ်းထားရန်လည်းလိုအပ်ပါသည်။

“ကျွန်ုပ်တို့သည် ဘေးကင်း၍လုံခြုံသော လုပ်ငန်းခွင်ကို ပံ့ပိုးပေးပါသည်။”

ကျွန်ုပ်တို့သည် 'Safety First' နှင့် 'People First' တည်းဟူသောအစရှိသည့် တန်ဖိုးတို့ကို မွေးမြူကျင့်သုံးသည့် အသိုက်အဝန်းတစ်ရပ်ကို ပြုစုပျိုးထောင်တည်ဆောက်သွားရန် သန္နိဌာန်ချထားပါသည်။ ဤသန္နိဌာန်သည် ကျွန်ုပ်တို့၏တန်ဖိုးကွင်းဆက်တစ်လျှောက်တွင် အကျုံးဝင်ပြီး ကျန်းမာရေး၊ ဘေးကင်းရေးနှင့် လုံခြုံ ရေးအန္တရာယ်များကို ဖော်ထုတ်ရန်နှင့် လျော့ပါးစေရန်အတွက် ကျွန်ုပ်တို့၏ မိတ်ဖက်လုပ်ငန်းများ/လုပ်ငန်းလုပ်ဖော်ကိုင်ဖက်များနှင့် ပူးပေါင်း ဆောင်ရွက်ခြင်း ပါဝင်ပါသည်။

ကျွန်ုပ်တို့သည် ကျန်းမာ၊ လုံခြုံပြီး စိတ်ချရသော လုပ်ငန်းခွင်ပတ်ဝန်းကျင်ကို ပေးအပ်ရန် သန္နိဌာန်ချကတိပြုထားပြီး ကျွန်ုပ်တို့၏ ဝန်ထမ်းများအား 'Right to Stop--ရပ်တန့်ပိုင်ခွင့် အခွင့်အရေး' အခွင့်အာဏာဖြင့် အန္တရာယ်ရှိသော လုပ်ဆောင်ချက်များကို ဖြေရှင်းရန် သန္နိဌာန်ချထားကတိပြု ပါသည်။

ကျွန်ုပ်တို့သည် ကွန်ရက်လည်ပတ်မှုတွင်လျှပ်စစ်သံလိုက်စက်ကွင်းများအသုံးပြုခြင်းတို့အပါအဝင် သက်ဆိုင်ရာ ကျန်းမာရေး၊ ဘေးကင်းရေးနှင့် လုံခြုံရေးဆိုင်ရာ ဥပဒေများ၊ လမ်းညွှန်ချက်များ နှင့် နိုင်ငံတကာအသိအမှတ်ပြု စံနှုန်းများကို လိုက်နာပါသည်။

မတော်တဆမှုများ၊ မတော်တဆဖြစ်လုနီးကြုံတွေ့ရမှုများနှင့် အန္တရာယ်မကင်းသော ပြုလုပ်ဆောင်ရွက်မှုများနှင့် အခြေအနေအားလုံးတို့မှ လေ့လာသင်ယူမှုပြုကြရန် နှင့် ပွင့်လင်းမြင်သာမှုရှိစေရန် တိုက်တွန်းအားပေးလျှက် ကျန်းမာရေး၊ဘေးကင်းရေးနှင့် လုံခြုံရေးဆိုင်ရာ မတော်တဆမှုအဖြစ်အပျက်များ တင်ပြအစီရင်ခံခြင်းတို့ကို ထက်မြက်တက်ကြွစွာဖြင့်ဆောင်ရွက်သည့် အလေ့အထယဉ်ကျေးမှုတစ်ရပ်ဖြစ်ထွန်းရန် ကျွုန်ပ်တို့ အားပေးချီးမြှောက်မြှင့်တင်လျှက်ရှိပြီး ဤနည်းလမ်းသည် စဉ်ဆက်မပြတ်တိုးတက်မှုနှင့် အသိပညာမျှဝေခြင်းတို့ကို အထောက်အကူဖြစ်စေပါသည်။

သယ်ယူပို့ဆောင်ရေး ဘေးကင်းရေးသည် ကျွန်ုပ်တို့အတွက် အဓိကအလေးထားအာရုံစိုက်ရမည့်အရာဖြစ်ပြီး မြို့ပြ/ဗဟိုနှင့်‌ဒေသန္တရ(corporate and regional) အဆင့်နှစ်ရပ်လုံးတွင် သယ်ယူပို့ဆောင်ရေး ဘေးကင်းရေး စံနှုန်းများနှင့်အညီ လိုက်နာဆောင်ရွက်ကြစေရေးကို အားပေးချီးမြှောက်မြှင့်တင်ဆောင်ရွက်သွားရန် ကျွန်ုပ်တို့ သန္နိဌာန်ချထားပါသည်။

လုပ်ငန်းခွင်တွင် မူးယစ်ဆေးဝါးနှင့် အရက်သေစာသုံးစွဲမှုကို လုံးဝသည်းမခံသည့်တင်းကျပ်သော (“Zero Tolerance”) မူဝါဒရှိပါသည်။ ဝန်ထမ်းများသည် ၎င်းတို့၏ တာဝန် ဝတ္တရားများကို ဘေးကင်းစွာ ထမ်းဆောင်နိုင်စွမ်းကို ထိခိုက်စေသော မူးယစ်ထုံထိုင်း‌ဘေးဖြစ်စေတတ်သော အရာဝတ္ထုများ၏ လွှမ်းမိုးမှုအောက်တွင် မရှိစေရပါ။

“ဂုဏ်သိက္ခာနဲ့ လေးစားမှုကို လုပ်ငန်းခွင်တွင် ကျွန်ုပ်တို့ ပြသပါသည်။”

ကျွန်ုပ်တို့သည် အလုပ်သမားအခွင့်အရေးများကို အခြေခံလူ့အခွင့်အရေးအဖြစ် ထောက်ခံအားပေးပါသည်။ ၎င်းတွင် ဝန်ထမ်းအားလုံးနှင့် ATOM နှင့်အတူလက်တွဲလုပ်ကိုင်လျှက်ရှိကြသော မိတ်ဖက်လက်တွဲဖော်လုပ်ငန်းပါတနာ အားလုံးအတွက် တရားမျှတသော လစာ၊ အကျိုးခံစားခွင့်များနှင့် လွတ်လပ်စွာ သင်းပင်းဖွဲ့စည်းပိုင်ခွင့်တို့ကို သေချာစေခြင်းတို့ပါဝင်သည်။

ကျွန်ုပ်တို့သည် ဝန်ထမ်းအားလုံး၏ ရုပ်ပိုင်းဆိုင်ရာနှင့် စိတ်ပိုင်းဆိုင်ရာကျန်းမာချမ်းသာရေးကို ဦးစားပေးပါသည်။ ကျား၊ မ၊ လိင်ပိုင်းဆိုင်ရာရပ်တည်ချက် သို့မဟုတ် ဝိသေသလက္ခဏာ၊ လူမျိုး၊ မသန်စွမ်းမှု၊ အမျိုးဇာတိမူရင်းဒေသ၊ ဘာသာရေး ယုံကြည်ကိုးကွယ်မှုအပေါ်တွင်အခြေခံ၍ပြုလုပ်သော အရေးယူမှုများအပါအဝင် မည်သည့်အကြောင်းကြောင့်မဆို နှောက်ယှက်ခြင်း၊ ခြိမ်းခြောက်ခြင်း၊ ခွဲခြားဆက်ဆံခြင်း သို့မဟုတ် အကြမ်းဖက်မှုအန္တရာယ်များမှ အကာအကွယ် ပေးထားသော၊ လေးစား ထိုက်သော အလုပ်ပတ်ဝန်းကျင်ကို/လုပ်ငန်းခွင်အသိုက်အမြုံတစ်ရပ်ကို ဖန်တီးတည်ဆောက်ရန် ကျွန်ုပ်တို့ရည်စူးထားပါသည်။

ဝန်ထမ်းများ၏ မတူကွဲပြားမှုသည် ကျွန်ုပ်တို့၏ ရှုမြင်သုံးသပ်ပုံများကို ပိုမိုကျယ်ပြန့်လာစေနိုင်ပြီး သုံးစွဲသူများ၏ လိုအင်နှင့်လိုအပ်ချက်များကို ဖြည့်ဆည်းရာတွင် ပိုမိုကောင်းမွန်စွာ ဖြည့်ဆည်းဆောင်ရွက်ပေးနိုင်စွမ်းရရှိနိုင်ကြောင်း အသိမှတ်ပြုလျှက် ကျွန်ုပ်တို့သည် အလုပ်ခန့်ထားခြင်းဆိုင်ရာကျင့်သုံးဆောင်ရွက်မှုအလေ့အထများတွင် တန်းတူညီမျှမှုနှင့် အားလုံးပါဝင်နိုင်မှုကို အားပေးချီးမြှင့်ပါသည်။

ကျွန်ုပ်တို့သည် ဝန်ထမ်းများ၏တစ်မူထူးခြားသောအယူအဆများနှင့်ကွဲပြားမှုများကို တန်ဖိုးထား လေးစားပါသည်။ ကျွန်ုပ်တို့ သည် မတူကွဲပြားသော အမြင်များကို တက်ကြွစွာဂရုတစိုက်/အလေးအနက်ထား နားထောင်ပြီး ၎င်းတို့၏ အရည်အသွေး/ကောင်းကျိုးဆိုးပြစ်အ‌ပေါ်တွင် ကောင်းကျိုးများကိုသာ အခြေခံ၍ အကဲဖြတ် ပါသည်။

ကျွန်ုပ်တို့သည် လေးစားမှု၊ ရိုးသားမှုနှင့် ပရော်ဖက်ရှင်နယ်ဆန်သော သွင်ပြင်လက္ခဏာတို့ဖြင့် ထုံမွှမ်းခြယ်သထားသည့် လုပ်ငန်းခွင်ပတ်ဝန်းကျင်တစ်ခုကို ပြုစုပျိုးထောင်မွေးမြူတည်ဆောက်ပါသည်။

ကျွန်ုပ်တို့သည် လုပ်ငန်းခွင်၌ အမြဲတမ်း သပ်ရပ်စွာနှင့် သင့်တော်စွာ ဝတ်စားဆင်ယင်ကြပါသည်။

ကျွန်ုပ်တို့သည် အလုပ်တာဝန်များ သို့မဟုတ် ဆက်ဆံရေးများကြောင့် ဖြစ်ပွားပေါ်ပေါက်သော စော်ကားမှုအဖြစ်အပျက်များ လုပ်ငန်းခွင်ပြင်ပတွင်ဖြစ်ပွားသည့် စော်ကားမှုများအပါအဝင် လိင်ပိုင်းဆိုင်ရာ ထိပါးနှောက်ယှက်စော်ကားမှုများကို လုံးဝလက်မခံကြောင်းနှင့် မည်သည့်အခြေအနေ အချိန်အခါမျိုးတွင်မဆို လုံးဝသည်းခံမည် မဟုတ်ပါ။

မနှစ်မြို့ဖွယ်သရော်ခြင်း၊ ပြောင်လှောင်ခြင်း၊ ဂုဏ်သတင်းညှိုးနွမ်းစေရန် စွပ်စွဲပြောဆိုခြင်း၊ သမုတ်ခြင်း သို့မဟုတ် ခြိမ်းခြောက်ခြင်း တို့ကဲ့သို့သော အမျိုးအစားများပါဝင်သော စကားကို ပြောဆိုခြင်း သို့မဟုတ် ဆက်သွယ်ပြောဆိုမှုများကို ပေးပို့ခြင်းတို့တွင် ကျွန်ုပ်တို့ပါဝင်ခြင်းမရှိသကဲ့သို့ မနှစ်မြို့ဖွယ်ပုံများ၊ ကာတွန်းများ၊ ရေးသားချက်များကို ပြသခြင်း သို့မဟုတ် ကိုယ်နှုတ်မူရာပြခြင်းတို့ကို ကျွန်ုပ်တို့ မပြုပါ၊

မည်သည့် ထိပါးနှောက်ယှက်မှု သို့မဟုတ် မလျော်ကန် မလျောက်ပတ်သည့် အပြုအမူများဖြစ်ပွားပေါ်ပေါက်မှုကိုမဆို ရင်ဆိုင်ဖြေရှင်း၍ ကျွန်ုပ်တို့၏လုပ်ငန်းခွင်ဝန်းကျင်ကို တက်ကြွစွာ ကာကွယ်စောင့်ရှောက်ပါသည်။

ကျွန်ုပ်တို့သည် အလုပ်ခွင်တွင် အရက်သေစာသောက်စားခြင်း သို့မဟုတ် တရားမဝင်မူးယစ်ဆေးဝါး သုံးစွဲခြင်းတို့ကို သို့မဟုတ် ကုသဆေးဝါးများကို အလွဲသုံးစားပြုခြင်းတို့ကို မပြုလုပ်ရပါ၊ ထို့အပြင် ကျွန်ုပ်တို့သည် လိင်ဝန်ဆောင်မှုများကို လုပ်ငန်းတာဝန်ဖြင့်ခရီးသွားလာလျက်ရှိစဉ် သို့မဟုတ် အခြားသော တာဝန်ပေးအပ်မှုများကို ထမ်းဆောင်စဉ် မည်သည့်အခါမျှ ဝယ်ယူခြင်းမပြုရပါ။

သက်ဆိုင်ရာကိစ္စရပ်တစ်ခုကို သဘောရိုးဖြင့် ထုတ်ဖေါ်ပြောဆို/သတင်းပို့သည့် အတွက် မည်သည့်ဝန်ထမ်း၊ မိတ်ဖက်လုပ်ငန်း သို့မဟုတ် သုံးစွဲသူ အပေါ်တွင်မဆို ကျွန်ုပ်တို့ တုန့်ပြန်လက်စားချေခြင်းမပြုပါ၊

သင့်လျော်သော အကြောင်းပြချက်မရှိဘဲ သက်ဆိုင် အကျုံးဝင်သော ဆွေးနွေးမှုများမှ မည်သူတစ်ဦးတစ်ယောက်ကိုမျှ ရည်ရွယ်ချက်ရှိရှိ ချန်လှပ်ဖယ်ထုတ်ထားခြင်းမရှိစေရေးကို သေချာစေရန် ကျွန်ုပ်တို့ ခိုင်မာစွာသန္နိဌာန်ချထားပါသည်။

“ကျွန်ုပ်တို့သည် ပတ်ဝန်းကျင်ကို ကာကွယ်စောင့်ရှောက်၍ ရာသီဥတု ပြောင်းလဲဖောက်ပြန်မှုများကို တားဆီးကာကွယ်ခြင်းတွင် ပါဝင်ဆောင်ရွက်သွားရန် ခိုင်မာစွာ သန္နိဌာန်ချထားပါသည်။”

ATOM သည် ကျွန်ုပ်တို့၏ကမ္ဘာ၊ ကျွန်ုပ်တို့၏အသိုင်းအဝိုင်းနှင့် ကျွန်ုပ်တို့၏လုပ်ငန်းလည်ပတ်ဆောင်ရွက် မှုအပေါ် ရာသီဥတု ပြောင်းလဲမှုသည် နက်နဲသောအကျိုးသက်ရောက်မှုရှိသည်ကို အသိအမှတ်ပြုပါသည်။ တာဝန်ယူမှု၊တာဝန်ခံမှုရှိသော ဆက်သွယ်ရေး အော်ပရေတာတစ်ဦးအနေဖြင့် ကျွန်ုပ်တို့သည် လက်တွေ့ဆောင်ရွက်အကောင်အထည်ဖော်နိုင်ပြီး တိုင်းတာချင့်တွက်အကဲဖြတ်နိုင်သော ကတိကဝတ်များမှတစ်ဆင့် သဘာဝပတ်ဝန်းကျင်ရေရှည်တည်တံ့မှုနှင့် ရာသီဥတုပြောင်းလဲမှုကို ကိုင်တွယ်ဖြေရှင်းရာတွင် အပြုသဘောဆောင်စွာဖြင့် ပါဝင်ပံ့ပိုးကူညီမှုပေးသွားရန် သန္နိဌာန်ချထားပါသည်။

ပတ်ဝန်းကျင်ထိန်းသိမ်းရေးလုပ်ဆောင်ချက်

• ကျွန်ုပ်တို့သည် သက်ဆိုင်ရာ ဒေသတွင်း စည်းမျဉ်းများနှင့် နိုင်ငံတကာ အသိအမှတ်ပြု ပတ်ဝန်းကျင်ဆိုင်ရာ စံချိန် စံညွှန်းအားလုံးကိုလိုက်နာပါသည်။
• ကျွန်ုပ်တို့သည် ရာသီဥတုနှင့် ပတ်ဝန်းကျင်အခြေအနေများအပေါ် ကျွန်ုပ်တို့လုပ်ကိုင်ဆောင်ရွက်မှုများ၏ အကျိုးသက်ရောက်မှုများနှင့်စပ်လျဉ်း၍ထုတ်ပြန်အစီရင်ခံခြင်းဖြင့် ပွင့်လင်းမြင်သာမှုကိုထိန်းသိမ်းထားရှိကာ ဆောင်ရွက်လျှက်ရှိပါသည်။
• ကျွန်ုပ်တို့ တွေ့မြင်သိရှိသော ရာသီဥတု သို့မဟုတ် ပတ်ဝန်းကျင်ကို ဆိုးရွားစွာ ထိခိုက်စေနိုင်သည့် မည်သည့်အဖြစ်အပျက်များကိုမဆို ကျွန်ုပ်တို့ အစီရင်ခံပါသည်။

ရေရှည်တည်တံ့စေရန်လုပ်ဆောင်သော အလေ့အထများ

• ကျွန်ုပ်တို့သည် စွမ်းအင်၊ရေနှင့် ကုန်ကြမ်းများအပါအဝင် ကျွန်ုပ်တို့၏ အရင်းအမြစ်များ သုံးစွဲမှုကို နည်းနိုင်သမျှအနည်းဆုံးသို့ လျှော့ချရန် သန္နိဌာန်ပြုထားပါသည်။
• ကျွန်ုပ်တို့သည် ကျွန်ုပ်တို့၏လုပ်ငန်းများမှ ဖန်လုံအိမ်ဓာတ်ငွေ့ထုတ်လွှတ်မှုကို ကန့်သတ်ထိန်းချုပ်နိုင်ရန် ကျိုးကြောင်းဆီလျော်၍ ထိရောက်သောအစီအမံများဖြင့် ကြိုးပမ်း အားထုတ်လျှက်ပါသည်။
• ကျွန်ုပ်တို့သည် ကုန်ပစ္စည်းနှင့် ဝန်ဆောင်မှုများကို ဝယ်ယူသည့်အခါတွင် ကျွန်ုပ်တို့ပေးသွင်းသူများ၏ ရာသီဥတုနှင့် ပတ်ဝန်းကျင်အပေါ်တွင် သက်ရောက်မှုများကို ထည့်သွင်းစဉ်းစားပြီး တာဝန်ရှိသော လုပ်ငန်း အလေ့အထများအပေါ် အခြေခံ၍ ၎င်းတို့ကို အကဲဖြတ်ပါသည်။
• ကျွန်ုပ်တို့သည် ကျွန်ုပ်တို့၏ စွန့်ပစ်ပစ္စည်းများကို အနည်းဆုံးဖြစ်အောင် ကြိုးပမ်း လုပ်ဆောင်ခြင်းအပါအဝင် ရေရှည်တည်တံ့သော စွန့်ပစ်ပစ္စည်းစီမံခန့်ခွဲမှုကို ထောက်ခံအားပေးပါသည်။

“ကျွန်ုပ်တို့သည်လူ့အခွင့်အရေးကို လေးစားပါသည်။”

ကျွန်ုပ်တို့သည် ကျွန်ုပ်တို့၏ လုပ်ငန်းဆောင်ရွက်မှုကဏ္ဍအားလုံးတွင် လူ့အခွင့်အရေးကို လေးစားလိုက်နာရန်နှင့် မြှင့်တင်ရန် ခိုင်မာစွာ သန္နိဌာန်ချထားပါသည်။ လူ့အခွင့်အရေးကို ကာကွယ်စောင့်ရှောက်ခြင်းသည် ကိုယ်ကျင့်တရားဆိုင်ရာ တာဝန်တစ်ခုသာမကဘဲ တာဝန်သိစီးပွားရေးလုပ်ငန်းတစ်ခုအနေဖြင့် ကျွန်ုပ်တို့၏အောင်မြင်မှုနှင့် ရေရှည်တည်တံ့ခိုင်မြဲမှုအတွက် မရှိမဖြစ် လိုအပ်သည်ဟု ကျွန်ုပ်တို့ယုံကြည်ပါသည်။ လူအခွင့်အရေးဆိုင်ရာ ကျွန်ုပ်တို့၏ သန္နိဌာန်သည် နိုင်ငံတကာအသိအမှတ်ပြု လူ့အခွင့်အရေး စံနှုန်းများ၊ အခြေခံမူများနှင့် ကိုက်ညီမှုရှိပါသည်။

နိုင်ငံတကာ ကြေညာစာတမ်းများ/သဘောတူညီချက်များ(international convention)နှင့် ဒေသန္တရဥပဒေများတွင် ဖော်ပြထားသည့်အတိုင်း လူတစ်ဦးချင်းစီအား ခွဲခြား ဆက်ဆံခြင်းမရှိဘဲ လူ့အခွင့်အရေးရပိုင်ခွင့်ရှိကြောင်း ကျွန်ုပ်တို့ အတည်ပြုကြေညာပါသည်။

ကျွန်ုပ်တို့သည် ကလေးသူငယ်များ၏ အခွင့်အရေးများကို လေးစားလိုက်နာပြီး ပံ့ပိုးကူညီမှုများကို တက်ကြွစွာ လုပ်ဆောင် ပါသည်။

ကျွန်ုပ်တို့သည် ကျွန်ုပ်တို့၏ဝန်ထမ်းများ၊ ကျွန်ုပ်တို့စီးပွားရေးလုပ်ဖော်ကိုင်ဖက်များ၏ဝန်ထမ်းများနှင့် ကျွန်ုပ်တို့ ဖောက်သည်များ၏ လူ့အခွင့် အရေးကို ထိန်းသိမ်းစောင့်ရှောက်ထားရန် သန္နိဌာန်ပြုပါသည်။ ကျွန်ုပ်တို့သည် ဤအခွင့်အရေး များကို မချိုးဖောက်သကဲ့သို့ အခြားသူများ၏ မည်သည့်ချိုးဖောက်မှုများတွင်မဆိုလည်း ကြံရာပါအဖြစ်ပါ၀င်ပတ်သက်မှုမရှိစေရန် အတတ်နိုင်ဆုံး အကောင်းဆုံးအားဖြင့် ကျွန်ုပ်တို့က သေချာစွာ ဆောင်ရွက်ပါသည်။

ကျွန်ုပ်တို့သည် ကျွန်ုပ်တို့၏လုပ်ငန်းကို တရားမျှတပြီး ခွဲခြားမှုမရှိဘဲ လုပ်ဆောင်သွားရန် သန္နိဌာန်ချထားပြီး ကျွန်ုပ်တို့၏ စီးပွားရေးလုပ်ဖော်ကိုင်ဖက်များအားလည်းလူ့အခွင့်အရေးကို လေးစားလိုက်နာရန် တိုက်တွန်းပါသည်။

ကျွန်ုပ်တို့၏ လုပ်ငန်းအလေ့အကျင့်များမှတစ်ဆင့် ကလေးသူငယ်အခွင့်အရေးများအပါအဝင် လူတစ်ဦးချင်းစီ၏ လူ့အခွင့် အရေးနှင့်စပ်လျဉ်း၍အများကြုံတွေ့နေရသည့် အခက်အခဲများ၊ စိန်ခေါ်မှုများကို အပြုသဘောဆောင်စွာဖြင့် သြဇာလွှမ်းမိုး၍ ဖြေရှင်းဆောင်ရွက်နိုင်ရန် ကျွန်ုပ်တို့ ကြိုးပမ်းအားထုတ်ဆောင်ရွက် လျှက်ရှိပါသည်။

ကျွန်ုပ်တို့သည် လူ့အခွင့်အရေးဥပဒေများကို ချိုးဖောက်သည်ဟု သိရှိထားသော စီးပွားရေးလုပ်ဖော်ကိုင်ဖက်များနှင့် ပတ်သက်ဆက်ဆံခြင်းကိုရှောင်ကြဉ်ပြီး ကျွန်ုပ်တို့၏လုပ်ငန်းဆက်ဆံရေးသည် ကျွန်ုပ်တို့၏တန်ဖိုးများနှင့် ကိုက်ညီမှုရှိစေ‌ရေးကို သေချာ စေပါသည်။

ကျွန်ုပ်တို့၏လုပ်ငန်းဆောင်ရွက်မှုများနှင့်ပတ်သက်သည့် လူ့အခွင့်အရေးချိုးဖောက်မှုများအပေါ် သဘောရိုးဖြင့်အစီရင်ခံ တင်ပြသူများကို လက်တုံ့ပြန်ခြင်းအား ဆန့်ကျင်ဆောင်ရွက်ခြင်းအတွက် တင်းကျပ်သောမူဝါဒကို ကျွန်ုပ်တို့ ထိန်းသိမ်းကျင့်သုံးပါသည်။ ယင်းအစီရင်ခံချက်များကို လျှို့ဝှက်မှုနှင့် လေးနက်မှုအားဖြင့် အမြင့်ဆုံးထားရှိ၍ ကိုင်တွယ်ဆောင်ရွက်လျှက်ရှိသည့် Integrity Hotline သို့ ပေးပို့တင်ပြသင့်ပါသည်။

“ကျွန်ုပ်တို့သည် ကျွန်ုပ်တို့၏ဖောက်သည်များ၊ ဝန်ထမ်းများနှင့် စီးပွားရေးလုပ်ဖော်ကိုင်ဖက်များ၏ ပုဂ္ဂိုလ်ရေး အချက်အလက်များကို ကာကွယ်ပေးပါသည်။”

ကျွန်ုပ်တို့သည် ဖောက်သည်များ၏ ပုဂ္ဂိုလ်ရေးသတင်းအချက်အလက်များ ဘေးကင်းလုံခြုံရေးကို အကာအကွယ်ပေးရန် သန္နိဌာန်ချထား ပါသည်။ ဆက်သွယ်ရေးအော်ပရေတာတစ်ဦးအနေဖြင့်၊ ကျွန်ုပ်တို့အား အပ်နှင်းထားသော ဒေတာများ၏ လျှို့ဝှက်မှုနှင့် မှန်ကန်မှုကို ထိန်းသိမ်းစောင့်ရှောက်ခြင်း၏ အရေးပါမှုကို ကျွန်ုပ်တို့အသိအမှတ်ပြုပါသည်။ ဤကဏ္ဍတွင် ကျွန်ုပ်တို့၏ ဒေတာ လုံခြုံရေးနှင့်စပ်လျဉ်း၍ ချဉ်းကပ်ပုံနှင့် ကာကွယ်ခြင်းနှင့်စပ်လျဉ်း၍ အမြင့်ဆုံးသော စံနှုန်းများကို သေချာစေရန်အတွက် ကျွန်ုပ်တို့ လိုက်နာသော အခြေခံမူများကို တိတိကျကျသတ်မှတ်ဖော်ပြထားပါသည်။

ကျွန်ုပ်တို့သည် ပုဂ္ဂိုလ်ရေးအချက်အလက်များကို အကာအကွယ်ပေးရန် သန္နိဌာန်ချထားပြီး ယင်းတို့ကို လုပ်ငန်းဆိုင်ရာ တရားဝင်ရည်ရွယ်ချက်များ အတွက်သာလျှင် သုံးစွဲခြင်းပြုရန် သေချာစေပါသည်။ ပုဂ္ဂိုလ်ရေး အချက်အလက်များတွင် ဝန်ထမ်း၊ ဝယ်ယူသူနှင့် စီးပွားရေးလုပ်ဖော်ကိုင်ဖက်တို့၏ အချက်အလက်များဖြစ်သည့် ဖုန်းနံပါတ်များ၊ အီးမေးလိပ်စာများ၊ နေရပ်လိပ်စာလိပ်စာများ၊ တည်နေရာများ၊ ခေါ်ဆိုမှုနှင့် ငွေပေးချေမှုမှတ်တမ်း၊ လစာနှင့် ကျန်းမာရေးဆိုင်ရာ သတင်း အချက်အလက်များ ပါဝင်သည်။

ကျွန်ုပ်တို့သည် ကုမ္ပဏီတစ်ဝှမ်းရှိ ပုဂ္ဂိုလ်ရေးအချက်အလက်များကို စီမံခန့်ခွဲရန် ATOM ၏ ပုဂ္ဂိုလ်ရေးအချက်အလက်များလုံခြုံမှုဆိုင်ရာမူဝါဒကို လိုက်နာပါသည်။

ဝင်ရောက်ရယူခွင့်ကို တင်းကြပ်စွာထိန်းချုပ်ထားခြင်း၊ ခိုင်မာသောလုံခြုံရေးအစီအမံများနှင့် ပြည့်စုံသောဒေတာကာကွယ်ရေး စနစ် များဖြင့် ဒေတာများကို ကောက်ယူစုဆောင်းသုံးစွဲရန် (processing data) ကျွန်ုပ်တို့ သန္နိဌာန်ချထားပါသည်။

ပုဂ္ဂိုလ်ရေးဆိုင်ရာ အချက်အလက်တို့ကို ကျွန်ုပ်တို့၏တယ်လီကွန်းဆက်သွယ်ရေးဝန်ဆောင်မှုများနှင့်ဆက်နွယ်နေသည့် အတိအကျသတ်မှတ်ထားသည့် လုပ်ငန်းဆိုင်ရာ ရည်ရွယ်ချက်ရှိသောကြောင့် အတိအလင်းခွင့်ပြုချက်ရရှိထားသည့် လူပုဂ္ဂိုလ်များ သို့မဟုတ် အဖွဲ့အစည်းများနှင့်သာလျှင် မျှဝေခြင်းပြုနိုင်သည်၊ အတိအလင်းခွင့်ပြုထားသူများ သို့မဟုတ် ဥပဒေလိုအပ်ချက်အရခွင့်ပြုထားသူများမဟုတ်လျှင် ထိုကဲ့သို့မျှဝေခြင်းမပြုရ။

ကျွန်ုပ်တို့သည် ဒေတာကာကွယ်ရေးစံနှုန်းများကို ထိန်းသိမ်းထားနိုင်ရန်အတွက် ပုဂ္ဂိုလ်ရေးအချက်အလက်လုံခြုံမှုဆိုင်ရာအစီအမံများကို စီးပွားရေးလုပ်ဖော်ကိုင်ဖက်များအတွက် ကျင့်သုံးပါသည်။

“ကျွန်ုပ်တို့သည် သတင်းအချက်အလက်များကိုလုံခြုံစွာသိမ်းဆည်းထားပြီးကုမ္ပဏီပိုင်ဆိုင်မှုများကိုအကာအကွယ် ပေးပါ သည်။”

လျှို့ဝှက်ထားမှုသည် ကျွန်ုပ်တို့၏ဂုဏ်သတင်းကို ထိန်းသိမ်းရန်နှင့် ဥပဒေဘောင်အတွင်းမှ ယှဉ်ပြိုင်နိုင်စွမ်းရှိရှိဖြင့် ကျွန်ုပ်တို့၏ အကျိုးစီးပွားများကို အကာအကွယ်ပေးရန်အပြင် ကျွန်ုပ်တို့ပိုင်ဆိုင်မှုများ၏ အရည်အသွေးနှင့်အသုံးဝင်မှု ဂုဏ်သိက္ခာတို့ ကို ထိန်းသိမ်း စောင့်ရှောက်ရန် အတွက် မရှိမဖြစ်လိုအပ်ပါသည်။

ATOM တွင် ကျွန်ုပ်တို့၏ သတင်းအချက်အလက်များကို အကာအကွယ်ပေးခြင်းနှင့် လုပ်ငန်းလုံခြုံရေးကို သေချာစေခြင်းသည် ကျွန်ုပ်တို့၏ဖောက်သည်များ၊ လုပ်ဖော်ကိုင်ဖက်များနှင့် ဝန်ထမ်းများ၏ယုံကြည်မှုကို ထိန်းသိမ်းထားရန် အခြေခံကျပါသည်။ ကျွန်ုပ်တို့သည် ကျွန်ုပ်တို့၏ သတင်းအချက်အလက်ပိုင်ဆိုင်မှုများကို သင်းဖွဲ့တွင်းမှဖြစ်စေ၊ သင်းဖွဲ့ပြင်ပမှဖြစ်စေ၊ ရည်ရွယ်ကြံစည်၍ဖြစ်စေ၊မတော်တဆအားဖြင့်ဖြစ်စေ ခြိမ်းခြောက်မှုများမှ ကာကွယ်ပေးရန် သန္နိဌာန်ချထားသည်။

ကျွန်ုပ်တို့သည်ကုမ္ပဏီ၏မူဝါဒတွင် ဖော်ပြထားသော လုံခြုံရေးဆိုင်ရာ အဆင့်အတန်းခွဲခြားသတ်မှတ်ချက်တို့နှင့်အညီ သတင်းအချက်အလက်အားလုံးကို ကိုင်တွယ်ဆောင်ရွက်ရန် တာဝန်ရှိပါသည်။

ကုမ္ပဏီ၊ ဖောက်သည်များ သို့မဟုတ် လုပ်ငန်းလုပ်ဖော်ကိုင်ဖက်များနှင့် ပတ်သက်သော လျှို့ဝှက်အချက်အလက်များကို ကျွန်ုပ်တို့က ဝင်ရောက်ရယူကြည့်ရှုခွင့်ရှိနိုင်မည်ဖြစ်ပြီး ၎င်းတို့ကို ဆင်ခြင်တုံတရားဖြင့် သတိကြီးကြီးထား၍ အထူးဂရုစိုက် ကိုင်တွယ်ဆောင်ရွက်ရန် လိုအပ်ပါသည်။

လျှို့ဝှက်အချက်အလက်များကို တရားဝင်ခွင့်ပြုချက်နှင့် လုပ်ငန်းဆိုင်ရာတရားဝင်ရည်ရွယ်ချက်များအတွက်သာ မျှဝေခြင်းပြု၍ ခွင့်ပြုချက်မရှိဘဲ ဝင်ရောက်ရယူကြည့်ရှုခြင်းမှ ကာကွယ်ထားကြောင်း ကျွန်ုပ်တို့က သေချာစေပါသည်။ ကျွန်ုပ်တို့သည် အသိပညာမျှဝေခြင်းကို အားပေးသော်လည်း၊ လျှို့ဝှက်အချက်အလက်များဖြင့် လုပ်ကိုင်ဆောင်ရွက်ရပါက သတိနှင့်ဆင်ခြင်တုံတရားအပြည့်ထား၍ လုပ်ကိုင်ဆောင်ရွက်ပြီး အများပြည်သူနှင့်သက်ဆိုင်သည့်နေရာဌာနများတွင် အရေးကြီးသောအကြောင်းအရာများကို ဆွေးနွေးခြင်းမှ ရှောင်ကြဉ်ပါသည်။

ကျွန်ုပ်တို့သည် ပြင်ပအဖွဲ့အစည်းများထံမှရရှိသော သတင်းအချက်အလက်များကို ကျွန်ုပ်တို့၏ကိုယ်ပိုင် သတင်းအချက်အလက်များကဲ့သို့ပင် တူညီသောလျှို့ဝှက်မှုနှင့် အလေးဂရုပြုမှုအဆင့်ဖြင့် ဆောင်ရွက်ပါသည်။

တန်ဖိုးအားဖြင့်မြင့်မားသော ကုမ္ပဏီ၏မှတ်တမ်းမှတ်ရာများကို သတ်မှတ်ဖော်ထုတ်၍ ကာကွယ်စောင့်ရှောက်ထားကာ မှတ်တမ်းများကို ထိးန်သိမ်းထားရှိရန် ကုမ္ပဏီတွင်းနှင့်ပြင်ပလိုအပ်ချက်နှစ်ရပ်လုံးအတွက် လိုက်နာစောင့်ထိန်းပါသည်။

ATOM မှ ရရှိသော သတင်းအချက်အလက်အားလုံးသည် ယုံကြည်စိတ်ချရပြီးမှန်ကန်မှုရှိကာ မြင့်မားသော ပရော်ဖက် ရှင်နယ်နှင့် ကျင့်ဝတ်ဆိုင်ရာ စံနှုန်းများနှင့် ကိုက်ညီမှုရှိကြောင်း သေချာစေပါသည်။

ကျွန်ုပ်တို့သည် ATOMက ခွင့်ပြုထားသော စနစ်များကို အသုံးပြုပြီး၊ သတင်းအချက်အလက်များ ကောက်ယူစုဆောင်းကိုင်တွယ်သုံးစွဲခြင်းဆိုင်ရာလိုအပ်ချက်များကို လိုက်နာပါသည်။

ကျွန်ုပ်တို့သည် လုပ်ငန်းဆိုင်ရာ ဆုံးဖြတ်ချက်များကို အကောင်အထည်ဖေါ်ဆောင်ရွက်ရာတွင် တွေ့ကြုံရနိုင်သည့် လုံခြုံရေးအရဆုံးရှုံးနိုင်ခြေနှင့်ဘေးအန္တရာယ်များကို အမြဲချင့်တွက်အကဲခတ်၍ လုံခြုံရေးဆိုင်ရာ မူဝါဒများနှင့်လိုအပ်ချက်များကို အမြဲလိုက်နာဆောင်ရွက်ပါသည်။

ကျွန်ုပ်တို့သည် ဘဏ္ဍာရေး၊ လုပ်ငန်းလည်ပတ်ရေး နှင့် အမည်ဂုဏ်သတင်းကျော်စောမှုပိုင်းဆိုင်ရာတို့တွင်ပါ အကျိုးသက်ရောက်လျှက်ကျွန်ုပ်တို့၏ပိုင်ဆိုင်မှုများကို ကြီးမားသိသာစွာ ထိခိုက်စေနိုင်သည့်၊ လုံခြုံရေးဆိုင်ရာ မတော်တဆအဖြစ်အပျက်များကို ကုမ္ပဏီလုပ်ထုံးလုပ်နည်းများ၊ ဥပဒေများ၊ စည်းမျဉ်းများနှင့်အညီ ချက်ချင်း အစီရင်ခံပါသည်။

ကျွန်ုပ်တို့သည် ကုမ္ပဏီ၏ပိုင်ဆိုင်မှုများကို ပျောက်ပျက်ဆုံးရှုံးခြင်း၊ ပျက်စီးခြင်း၊ ခိုးယူခြင်း၊ လေလွင့်ခြင်း နှင့် အလွဲသုံးစားလုပ်ခြင်းတို့မှကာကွယ်ရာတွင် မိမိ၏ပိုင်ဆိုင်မှုများနည်းတူ အလေးဂရုထား၍ကာကွယ်စောင့်ရှောက် ပေးပါသည်။

ကျွန်ုပ်တို့သည် ကုမ္ပဏီ၏ပိုင်ဆိုင်မှုများကို ဝင်ရောက်ရယူသုံးစွဲပိုင်ခွင့်နှင့်စပ်လျဉ်း၍ လုပ်ငန်းတာဝန်ကို ပြီးမြောက်အောင်ဆောင်ရွက်ရန် လိုအပ်သည့်အတိုင်းအတာအပေါ်တွင်မူတည်၍ ကန့်သတ်ချက်ဖြင့်ပေးအပ်ပြီး ဝင်ရောက်ရယူသုံးစွဲခွင့် ပေးသည့်အခါတွင်လည်း စနစ်တကျသတ်မှတ်ထားသော လုပ်ထုံးလုပ်နည်းများကို အစဉ်အမြဲလိုက်နာသည့်ပြင် PIN နံပါတ်များ နှင့် စကားဝှက်တို့အပါအဝင် ဝင်ရောက်ရယူသုံးစွဲရန် ပေးအပ်ထားသည့် အချက်အလက်တို့ကို မျှဝေခြင်းမပြုရပါ။

ကျွန်ုပ်တို့သည် ကျွန်ုပ်တို့၏ ဉာဏပစ္စည်းမူပိုင်ခွင့်ကို ကာကွယ်စောင့်ရှောက်ပြီး အခြားသူများ၏ ဉာဏပစ္စည်းမူပိုင်ခွင့် အခွင့်ကို လေးစားသမှုနှင့်ကျင့်ဝတ်သိက္ခာအားဖြင့် အမြင့်ဆုံးအဆင့်ထား၍ ကာကွယ်စောင့်ရှောက်ပါသည်။

ကျွန်ုပ်တို့သည် လုပ်ငန်းလုံခြုံရေးမူဝါဒ၊သတင်းအချက်အလက်လုံခြုံရေးနှင့် ရုပ်ဝတ္ထုပိုင်းဆိုင်ရာလုံခြုံရေး လုပ်ထုံးလုပ်နည်းများကို လိုက်နာဆောင်ရွက်ရမည်၊ အကယ်၍ ပြုလုပ်ဆောင်ရွက်မှုများ၏သင့်လျော်မှုနှင့် ပတ်သက်၍ မသေချာပါက လမ်းညွှန်မှုရယူရပါမည်။

“ATOM သည် သဘောရိုးဖြင့် ထုတ်‌ဖော်ပြောဆိုသည့်သူများကို ဆန့်ကျင်တုံ့ပြန်ပြုလုပ်သည့် မည်သည့်လက်တုံ့ပြန်မှုမျိုးကိုမဆို သည်းမခံပါ။”

မိမိတို့၏ လုပ်ကိုင်ဆောင်ရွက်မှုများ ကျင့်ဝတ်စည်းကမ်းနှင့်ကိုက်ညီမှုပိုင်းဆိုင်ရာနှင့်ပတ်သက်၍ သံသယ သို့မဟုတ် မေးမြန်းစရာရှိလာသည့်အခါ ဝန်ထမ်းများသည် ကျင့်ဝတ်စည်းကမ်းလိုက်နာမှုဆိုင်ရာ လုပ်ဆောင်ချက်များနှင့် ပတ်သက်၍ သံသယ သို့မဟုတ် မေးခွန်းများရှိလာပါက ဝန်ထမ်းများသည် ၎င်းတို့၏ လိုင်းမန်နေဂျာများ(Line Manager) နှင့် Ethics and Compliance ဌာန သို့မေးမြန်းသင့်သည်။

ကျွန်ုပ်တို့၏ ကျင့်ဝတ်စည်းကမ်း သို့မဟုတ် သက်ဆိုင်ရာတည်ဆဲဥပဒေများကို ချိုးဖောက်သည်ဟု ယူဆရသည့် မည်သည့် လုပ်ဆောင်မှုများကိုမဆို သတင်းပို့ရန် ဝန်ထမ်းများတွင် တာဝန်ရှိပြီး ထိုသို့သော ပြုလုပ်ဆောင်ရွက်မှုသည် အမျှော်အမြင်ရှိသော၊ တာဝန်သိသော၊ ကျင့်ဝတ်သိက္ခာနှင့်ပြည်စုံသော တယ်လီကွန်းဆက်သွယ်ရေးအော်ပရေတာဟူသော ဂုဏ်ပုဒ်ကို ATOM Myanmar Limited ဆက်လက်ထိန်းသိမ်း ထားရန် များစွာ အထောက်အကူဖြစ်စေပါသည်။

ချိုးဖောက်မှုများကို လိုင်းမန်နေဂျာ(Line Manager) နှင့်/သို့မဟုတ် Ethics and Compliance Function တို့ထံသို့ သတင်းပို့တင်ပြခြင်းသည် တစ်ခါတစ်ရံတွင် သတ္တိရှိရန်လိုအပ်ကြောင်းကိုလည်း နားလည်ပါသည်။ ထို့ကြောင့်၊ ဝန်ထမ်းများနှင့် လုပ်ငန်း လုပ်ဖော်ကိုင်ဖက်များအတွက် ဖွင့်လှစ်ထားသော Integrity Hotline၊ 24/7 ဝက်ဘ်အခြေခံစနစ်သည် သတင်းပို့သူ တစ်ဦးချင်းစီနှင့် တိုင်ကြားခံရသူများ၏ ကိုယ်ရေးကိုယ်တာလုံခြုံမှုကို ကာကွယ်ရန်အတွက် တည်ထောင်ထားခြင်းဖြစ် သည်။ သတင်းပို့တင်ပြသူသည် အမည်ကို လျို့ဝှက် (anonymous) အနေဖြင့် ထားရှိလိုပါက အမည်မဖော်ပြပဲ သတင်းပို့တင်ပြနိုင်သည်။

လူကိုယ်တိုင်ဖြစ်စေ၊ Integrity Hotline မှဖြစ်စေ သတင်းပို့တင်ပြချက်အားလုံးကို အထူးလျှို့ဝှက်ချက်အနေဖြင့် သဘောထားကိုင်တွယ်ဆောင်ရွက်လျှက်ရှိပြီး တားမြစ်ကန့်သတ်ချက်များကို တင်းကျပ်စွာပြုလုပ်ထားရှိ၍ ကန့်သတ်ဦးရေကသာလျှင် ၎င်းစနစ်ကိုဝင်ရောက်ကြည့်ရှုနိုင်မည်။ သတင်းပို့တင်ပြချက်များကို အလေးအနက်ထားပြီး မျှတ၍ဘက်လိုက်မှုကင်းစွာဖြင့် ဓမ္မဓိဌာန်ကျကျ အလေးအနက်ထား ဆက်လက်ကိုင်တွယ် ဆောင်ရွက်သွားပါမည်။

စုံစမ်းစစ်ဆေးပြီးသော သတင်းပို့တင်ပြချက်တစ်ရပ်ကို Ethics and Compliance Committee အနေဖြင့် ဖြေရှင်းရာတွင် စည်းမျဉ်း၊စည်းကမ်းပိုင်းအရ အရေးယူဆောင်ရွက်ရန် သို့မဟုတ် ပြန်လည်တည့်မတ်ပြုပြင်ရေးဆောင်ရွက်ပေးရန် လိုအပ်ခြင်းရှိ/မရှိဆိုသည်ကို ဆုံးဖြတ်နိုင်ရန် Ethics and Compliance ဌာန က ကိစ္စရပ်တိုင်းတွင် ဝိုင်းဝန်းကူညီဆောင်ရွက်ပေးလျှက်ရှိပါသည်။ ဥပဒေ၊ ကျင့်ဝတ်စည်းကမ်း၊ သို့မဟုတ် ATOM မူဝါဒများ သို့မဟုတ် လုပ်ထုံးလုပ်နည်းများကို ချိုးဖောက်သူ မည်သူ့ကိုမဆို အလုပ်ရပ်စဲခြင်းပြုသည်အထိအရေးယူခြင်း အပါအဝင် စည်းမျဉ်းစည်းကမ်းပိုင်းဆိုင်ရာ အရေးယူခြင်းတို့ခံရနိုင်သည်။

ကျွန်ုပ်တို့အားလုံးသည် ပြန်လည်လက်တုံ့ပြန်ခြင်းကို စိုးရိမ်ကြောက်ရွံ့စရာမလိုဘဲ သိက္ခာမဲ့သော သို့မဟုတ် ဥပဒေနှင့်မညီသော၊ တရားမဝင်သော အပြုအမူများဟု သံသယရှိပါကယင်းတို့ကိုသတင်းပို့နိုင်ကြောင်းသိရှိရန် အရေးကြီးပါသည်။ သတင်းပို့တင်ပြသည့်ကိစ္စရပ်များသည် အပြန်အလှန်လေးစားမှုရှိခြင်း၊ ရိုးသားမှုရှိပြီး ညစ်ညမ်းသောစကားများနှင့် ခွဲခြားဆက်ဆံခြင်းတို့မှ ကင်းစင်ရမည်ဖြစ်ပြီး လက်ရှိကျင့်သုံးနေသည့် ဤကျင့်ဝတ်စည်းမျဉ်းကို လေးစားလိုက်နာပြီးဖြစ်ရမည်ဖြစ်သည်။သတင်းပို့ခြင်းအား အမည်မဖော်ဘဲ ပြုလုပ်နိုင်ရန် စီစဉ်ဆောင်ရွက်ပေးထားသော်လည်း လူကိုယ်တိုင်လာရောက်၍ ပွင့်ပွင့်လင်းလင်း ဆွေးနွေးခြင်းက အကောင်းဆုံး ရလဒ်များကိုအမြဲတမ်းရရှိနိုင်ပါသည်။ ATOM အတွက် အကောင်းဆုံးရလဒ်များ ရရှိရန်အလို့ငှာ သတ္တိရှိရှိနှင့် လူကိုယ်တိုင် လာ‌ရောက်ကြရန် ကျွန်ုပ်တို့က တိုက်တွန်းပါသည်။